上星期日得閒得滯,行下深水埗,在茶餐廳見到一個多年不見老友,原來他已經搬到深水埗住了一段時間,老友話自己本來住緊港島南區,最初搬到深水埗之後的確有些不慣,但後來發覺愈來愈多上了年紀而又有教養的人搬到深水埗,現在已經冇問題,但老友話,香港業主真無良,他從冇欠租,但業主竟然唔租比佢,唯有搬去深水埗。

我話與業主是否無良是沒有關係,在香港,一般業主都不會租比年紀大的租客,恐防有乜依郁,單位就會大幅貶值,立刻俾銀行追數,唔租都是自保而已,所以,年紀大的人可能要搬去大角咀,深水埗或者土瓜灣,其實這亦不是壞事,直接提升了那些老社區生活質素,年紀大租客冇功都有勞。

大約三十幾年前,我們幾個老友一齊出身,那位老友打外資銀行工,收入比我們好,但他是一個堅持不買樓的人,當時亦有不少KOL話,買樓的人是很蠢,咁高利息,只需要一半貸款利息就可以租到同樣單位,點解要買樓,老友當時的居住環境比我們好得多,不過,十年之後,貸款利息支出與租金相若,老友交租其實替業主供樓,二十年之後,利息支出已經高過租金很多,老友已經很少同我們聯絡,因為他為了節省租金,已經愈搬愈細,大家都無謂見面。

在任何時間,都有 KOL話租樓好過買樓,買了樓如果樓價下跌,就會欠下一筆巨債,亦有不少人相信,租樓又唔同,可以隨時轉換居住環境,而且又唔使花錢裝修,將買樓的錢用作其他投資,隨時可以賺得更多,唔買樓的信徒幾時都有,不過, KOL唔會話你知,年紀大了很難租到靚樓,而事實上真理是要自己發掘出來,甚至要自己嘗過苦果才知道什麼是真理。

湯文亮指,年紀大了很難租到靚樓。(廖雁雄攝)

【財經專欄】湯文亮|紀惠集團行政總裁

免責聲明︰以上內容僅代表作者的個人立場和觀點,不代表香港01的任何立場,香港01亦無法核實上述內容的真實性、準確性和原創性。

另外,以上純屬個人研究分享,並不代表任何第三方機構立場,亦非任何投資建議或勸誘。讀者務請運用個人獨立思考能力自行作出投資決定。

點解咁多KOL唱淡樓市 「太多人買樓,某些人搵唔到食」|湯文亮

Read More