美國隔晚假期休市，雖然今早A股保持升幅，但人民幣走弱，科網股捱沽，港股未扭轉調整之勢，半日跌逾200點，再度失守50天線(20767點)。
恒指低開27點，早段曾止跌回升54點，見20941，無奈科技股沽壓大，重磅科技股腳軟，大市再度掉頭兼再失50天線，最多跌269點，見半日低位20617。中午恒指收報20679，跌207點；國指跌穿7000水平，報6981，跌81點；恒科指跌近3%，收4204，跌106點。半日成交額565.08億元，未有新資金入場，繼續塘水滾塘魚。
藍籌股整體走軟，大笨象(00005)公布業績前半日跌0.6%，市場期待滙控公布的業績會有派息及回購計劃，如果事與願遺，股價隨時落返58樓下，加上60阻力大，業績前企到咁硬，結果同預期稍有偏差，都係瓜多過菜。其他藍籌股無乜邊隻精神，吉利(00175)半日升1%，表現算唔錯。工信部發布《免徵車輛購置稅新能源汽車車型目錄》，除咗吉利有份，比亞迪(01211)亦榜上有名，但比亞迪股價半日都要跌0.5%。
有消息指京東(09618)下月大灑百億搞補貼活動，股價半日插水6.8%，盤中更曾跌8%，跌得有啲急，其實接近190天呢啲支持位，可以買返啲博反彈。至於騰訊(00700)跟美團(03690)，半日跌3%，阿里(09988)跌2.5%，ATMJ四股佢最硬淨。其他科網股全線下跌，跌幅由超過2%至5%不等。
內房股今日逆市升，因為中證監啟動不動產私募投資基金試點，支持不動產市場平穩健康發展。整個板塊嘅股份，升不足1%至近6%都有，都係嗰句，有升幅無波幅係呢個板塊近日嘅走勢，一日內房債務危機未除，唔好諗住有大茶飯食，小打小鬧短炒就自己執生。
受惠煤炭下游需求回升，煤價有望改善，煤炭股造好，板塊內股份普遍升2%或以上，當中以蒙古焦煤(00975)半日升近8%最厲害，但呢隻相對其他煤炭股質地差一截，又係乘機博懞炒，成交唔算活躍，亦怕有人控制大局，睇咗當炒咗，呢啲股食少多教訓。內地電訊股續強，今日聯通(00762)再創52周高，半日股價升3%，其餘兩隻中資電訊股同樣逆市上升，但要高追免問，之前有貨喺手，唔急落車，等到掉頭轉陰燭先止賺亦未遲。
麥狄文(徐狄怡‧證監會持牌人)
